Inleiding

In die verlede is lidmate geografies ingedeel volgens wyke, maar met die ontwikkeling van Geloofsfokusgroepe het die situasie ontstaan dat mense oor wyks- en gemeentegrense by mekaar betrokke raak.

Ons beskou Geloofsfokusgroepe as die ideale groeigeleentheid vir lidmate om hulle geloof te verdiep. Geloofsfokusgroepe kom in sekere gevalle tot weekliks bymekaar ter wille van geestelike groei, onderlinge ondersteuning en om in liefde na ander mense uit te reik. Ons moedig lidmate sterk aan om aan ’n Geloofsfokusgroep te behoort.

Baie lidmate behoort nie aan ’n Geloofsfokusgroep nie, maar wel aan ’n kleingroep bv. ‘n groep met ‘n spesifieke belangstelling. Daar kan verskillende kleingroepe ontstaan na die behoefte in die gemeente.
Lidmate wat nie aan ’n Geloofsfokusgroep of kleingroep behoort nie, word in wyke ingedeel en steeds as volwaardige lidmate van die gemeente beskou. Hulle sal steeds toegang hê tot die pastorale versorging van ’n predikant wat met die invul van ’n huisbesoekkaartjie graag hulle wil besoek.

Hoekom deel word van ‘n Geloofsfokusgroep?

Die Geloofsfokusgroepstelsel is geskoei op Jesus se eie bediening: Hy het sy dissipels een vir een geroep (Mark 1:16-20 en 3:13-14) en saam met hulle 'n groep gevorm om vir mekaar om te gee en hulle navolging van die Here uit te leef. Hy het die dissipels ook opgelei om die evangelie met ander te deel (Hand 1:3-4 en 8). Baie mense het op die dissipels se getuienis gereageer en onder leiding van die Heilige Gees in mekaar se huise saamgekom. So is die eerste gemeente gestig en die koinonia-beginsel van intieme geestelike samesyn in gemeentes gevestig. Dié gebruik is gedurende die Hervorming van die Christelike Kerk voortgesit.

Om dissipel van Jesus Christus te wees, beteken om geestelike beginsels te ontdek, dit in jou daaglikse lewe toe te pas en met ander te deel. Die Geloofsfokusgroep skep die ruimte vir die praktiese beoefening van jou Christenskap. Maar ook in ander opsigte hou inskakeling by 'n Geloofsfokusgroep wonderlike seën in, nl:

• dit bied in hierdie sondige en stukkende wêreld 'n geestelike tuiste waar 'n gelowige ware vriendskap kan leer ken en sosiale bande smee wat tot eer van die Here sal wees; die enkeling word voorts deel gemaak van die liggaam van Christus sodat elkeen sy/haar verbondenheid met die gemeente aktief begin uitleef en daadwerklik by werksaamhede betrokke raak;
• dit bied 'n struktuur waar gelowiges naby mekaar kan kom sodat hulle mekaar in liefde kan dra en bystaan wanneer krisisse of probleme opduik;
• dit skep 'n oefenruimte waar gelowiges in 'n veilige liefdesruimte kan begin waag en leer om te bid, Bybelstudie te doen, te getuig en mekaar met hul gawes te dien;
• die Geloofsfokusgroep word ook 'n basis vir voorbidding, 'n plek waar gebedsverhoring en die werk van die Here beleef word;
• omdat lede mekaar baie gereeld sien, word die Geloofsfokusgroep 'n plek waar daar gesorg word dat die waarhede van die Skrif nie bloot nuwe of teoretiese kennis bly nie, maar prakties toegepas word en lewensverandering teweegbring;
• die Geloofsfokusgroep bring wonderlike groei en volwassenheid in mense se geestelike lewens – 'n kool vuur wat tussen die ander kole lê, brand steeds warm ; as dit egter eenkant lê, koel dit gou af (Op 3:16);
• dit word ook ‘n goeie geleentheid waar predikante en lidmate mekaar beter leer ken, omdat die groepe sover moontlik onder leiding van ‘n predikant plaasvind.

Die voordele van 'n Geloofsfokusgroep

Geen ander aksie in die gemeente lewer soveel vrug van geestelike groeikrag en persoonlike vervulling nie. Die Geloofsfokusgroep skep ‘n ruimte waarbinne die volgeling van die Here Jesus waarlik kan groei. Uit die klein kring van medegelowiges word as’t ware ‘n nuwe familie gebore! Dit bied man en vrou, vriend en vriendin, ouer en kind die geleentheid om saam betrokke te raak by die Woord van die Here, geestelik te groei en vervulling te beleef en saam by die gemeente in te skakel - alles boustowwe vir ‘n sinvolle en vervulde bestaan. In die intieme byeenkoms van ‘n Geloofsfokusgroep leer mense om God en hul medemens te vertrou. Baie lidmate beleef dit selfs as ‘n herlewing in hulle geloofslewe.

Is jy deel van 'n groep?